文:Tony Lam
揸揸吓車部車突然出現問題,相信唔少車主都試過,最普遍相信都係爆呔或者無油,情況未至於會嚇親,但若然講緊嘅係行行吓俾緊油個油門腳踏俾你踩斷咗,相信你應該唔止會即時叫出嚟,隨時 X 都嚇到瀨。
行行吓車突然踩斷油門個腳踏,俾你諗你最多認為呢啲只係電影情節,或者部車應該有番咁上下車齡,準備隨時攞去劏嗰隻質素先會咁,唔好意思,你咁諗就錯晒!話你聽呢件咁神奇嘅事係發生喺一部新車身上嘅,係咪估唔到先。部車咩牌子?Chery 囉,未聽過?中國自主品牌奇瑞汽車喎!哦,明晒!
呢單嘢發生嘅地點係俄羅斯,事發時一名俄羅斯男子正在為 Chery Tiggo 2 (奇瑞最新 SUV 車型)進行評測,當進行 0-100 公里加速測試時,腳下嘅油門突然出現狀況,男子即時停車並落車檢查,點知就發現原來個油門腳踏竟然被佢踩斷咗!(有片為證,唔係吹水。)踩爆偈就真係聽唔少,踩斷油門腳踏真係第一次聽,不過已經好過斷制動腳踏。最重要係呢部出事嘅主角新車落地唔係好耐,只係行咗 5,000 幾公里。不幸中嘅大幸係好在當時車速未算好快,而且地點係一條無人無車嘅直路,事主先可以安然無恙咁將件事公諸於世。
來源:Z Drive