評價:
先此聲明, 本人真的擁有此機, 不是某某打手同類, 機都未出就話用左一個月, 而且亂咁話人係清舊parts.
我由EOSm1升級上m50的, 中間跳過了很多代, 終於令到我忍唔到手升級既原因如下:
m2, 一來只是多了Wifi功能(好似話仲有對焦快左), 二來同m3推出同期, 不考慮
m3, 多了反mon, wifi功能, 對焦進步多, 有手握位手感好好多, 操作方便得多, 參數轉盤多, 但... 唔想咁快升級住, m1用得好地地, 我忍!
m5, DPAF終於肯下放落無反, 對焦超快 (聲稱比無反起家既S牌更快), 但是定價貴, 又向下反mon, 我再諗諗先, 我忍!!
m6, 同M5一樣, 少左個EVF, 需然我唔係成日用到EVF, 但我都係再諗諗先, 我忍!!!
(其餘的m10/m100只是入門機, 玩m-mode基本上每張相都有排set, 不考慮, 不用忍.)
m50, 今次到了m50, 雖然定位只是入門機, 但今次由單反下放得最多, 再加上不只是下放, 有新功能
下放: 4K拍片(6D2都冇呀陰公! 要5D4 / 1Dx2先有); 邊拍邊自動wifi過相; 等等功能.
新功能: 人眼對焦. (雖然其他牌子都有)
雖然只是入門機, 但機身等同m5(有手握位, 唔似m10/m100咁部機係直既), 仲要扭計mon, 好過m5既反mon, 所以今次忍唔到啦! (如果m50只係m100既機身加左4k功能,我就唔會買啦,但佢係m5身形,好有誠意既推出)
如果唔戴有色眼鏡睇Canon, 其實唔難感受到其誠意之作.
當然, 我同意是試水溫產品, 可能遲多一年會出M5/M6後繼機有4K.. 但是我覺得m50手感, 操作(m-mode操作除外), 外型等等, 其實已經迫近m5/m6(只是少了獨立的參數轉盤), 而又估計到如果m5/m6日後出後繼機有4k, 就唔係呢個價錢, 起碼定價會貴3千, 到時我咪又係得個"忍"字!
有邊間廠既相機產品唔係過度性? 除非佢執左粒, 佢既產品先至會升華成為紀念品.
至於個價錢值唔值, 我覺得算係咁, 人地牌子4K無反定價成皮野(雖然機身有5軸防震, 但m50鏡頭都有防震), 如果覺得唔太值既, 不防等多一陣降一降價先買啦.
呢部機最啱係加個22mm f/2鏡頭玩拍片, 可以配合到其自動對焦加上淺境深, 效果一流, 況且22mm f/2 鏡頭不貴, $1880值得買入.
雖然呢部機唔係我第一部相機有4K功能(我有ZS110, 一吋sensor), 但我始終對可換鏡頭大光圈情有獨鍾.
所以我選擇左白色m50, 我主力用途係加個轉接環(黑色)用大機鏡頭, 40mm f/2.8 餅鏡(白色, 100D拆kit得出來的), overall成部機唔算大部, 但做到淺境深, 以及外型十分靚仔, 黑白配答色. 咁特別既顏色配答, 可以做到文青機 (做文青唔一定要有一部古董外型既相機先做到, 雖然我係文中)
買一部相機, 通常都想玩盡其功能, 特別係所有參數都自己話晒事既m-mode, 日常街拍, 我最中意用m-mode.
而m50個m-mode拍照冇咁方便(比起m5/m6)呢一個係事實, 因為只有一個參數轉盤, 所以要同個touch mon混合咁用來續個參數set, 係冇咁方便. 但如果有心用m50來學影相, 由自動學到全手動, 都未嘗不可以. (點都好過m10/m100傻瓜機).
再者, m50雖然定義為入門機, 但都有熱靴, 增加擴充性能, 所以講真, 其實可以當佢係半專業機(m5/m6)咁用.
其實m50已經差唔多擁有晒Canon m系列機既所有功能(如果有一個m系列既所有功能剔分表去比佢續個功能剔分,m50應該有95%以上既格仔都剔左,什至會比m5/m6多,m5/m6估計有90%剔。)所以反而威脅到日後m5/m6出既後繼機,除非m5/m6後繼機有超突破性功能下放左,否則因為m50既存在,m5/m6後繼機想貴都幾難。
總結一下:
雖然我用了一日, 但我去showroom試了無數次(每次都要等人試完, 但為好多人爭住試), 所以寫左呢個心得.
咁既價錢, 雖然只是入門機, 但論外型, 功能, 其實我覺得比m5/m6過之無不及. 只是輸在m-mode時的操作性.
又咁樣講, 如果m5向下反mon同m50扭計mon比, 而價錢差不多, 我都寧願選擇m50.
下一步我計劃買一個無反用既三軸穩定器放置呢部m50, 去旅行時拍高質+穩定+流暢+淺景深既4K片.
我部m1, 陪左我4年幾5年, 仲係好地地, 如今正式退役, 但唔會賣, 太過有感情.