自上篇文章"快樂攝影"發表後，收到不少有關詢問。其中部分都是有關器材方面既問題。所以係進入正題前，先用少少時間講下我所用既器材。其實我一向都主張用最少既器材去拍攝，"快樂攝影"同本篇既相 (應該係所有我自己既家庭相) 都係用5D mark II, 35L, 同85 1.8，冇用同冇帶反光板及閃燈。我拍攝家庭相既取向係用自然光，當搵到一個光線好既地方拍攝，就冇用閃光燈既必要。
當然，用自然光定係用人造光源(閃光燈等)應該只係一個選擇，唔應該係限制。意思係你應該要識得點用閃光燈等，知道有咩限制同可以做到既野，然後再去選擇用自然光定人造光。
入正題，今次分享既係wide shot vs tele shot，意思係用咩依據去平衡相中既環境同人物既比重。當然，shot selection每個人都可以唔同，亦唔會有既定既答案。我所強調既係希望透過分享筆者既思維，引導大家去探索一下自己背後既reasoning。
影wide shot(環境比例較大)其中最大既困難係會俾人話睇唔到個樣，但有時睇唔到樣都可以係優點 :) 。筆者會以以下情況考慮：
1. 環境：如果有好既環境及線條，何不將人物放入環境既構圖中，總好過每次 "環境+人=到此一遊相"吧。另外，當女兒心情不佳、扭計時，亦係一個好既選擇，因為人物比例較細，人物既情感表達要求較低 (即係睇唔到佢個扭計樣) :)
2. 相片展示既方法：係相機LCD mon、4R相同係30" X 20"既油畫上係完全不同既事，影既時候可以先諗下相片既展示方法。係3"相機mon上睇唔楚個樣唔代表係油畫上睇唔到。
3. 其他：怕悶 (冇錯，就係怕悶)，有時影wide shot 就好似將3D 變回2D一樣，以線條及圖案去構圖，變化較大。
影較close up (人物比例較大) 筆者最既大考慮係：
1. 表情：正因為近，係面上既情感表達亦會越清楚，一張表情唔好既照片相信大家都唔會放係硬碟吧。
2. 光線：人既樣好唔好睇除了先天之外最大既影響就係光線同影 (係拍攝上)，所以越近就應該有越好既光線(或陰影)照係面上。
影一張滿意既相唔容易，尤其影小朋友就更加困難，因為小朋友既心情同表現未必與預期一樣，所以唔應該每次出去玩都要求有靚相，平常心，如果發現有好既環境想影就下一次再去，攝影既同時亦要享受與女兒玩既時間呢。
