1)ZF vs Z8
我本身用緊部Z8,主要鳥攝,所以買ZF的初衷,從來無諗過可以代替Z8,只是想買多部日常機,外貌先決。即使ZF只是得個復古外表,內裡只有Z5或Z6的功能,我都會買!何況…
除像數、手感操作及反應、和堆疊式CMOS外,ZF既功能並不輸Z8!尤其是防震及暗位對焦方面,我試過在同一場景下比較過,ZF既防震效果,特別是暗位對焦,實測確實比Z8強!
講到對焦速度,我覺得兩者差不多,不過Z8既反應會快少少,特別由最遠到最近,或最近到最遠,用單點對焦的時候。一般用tracking對焦時,兩者分別不大。
至於cmos方面,雖然ZF不是用堆疊式cmos,但高速連拍時,無論是機械或電子快門,都不覺有黑屏,用機械快門會有少少窒,但不嚴重,至於用電子快門時,我沒有認真考究有無變型問題。
所以,我覺得ZF用作鳥攝都可以,只是手感反應及操作問題,與及無得crop,或者crop完只剩返一千萬像。
2)復古與手動功能
我本身是Leica用家,包括數碼及菲林,諗住買部ZF可以玩埋Leica手動鏡。點知一試之後,我覺得用ZF玩Leica鏡頭,仲好玩過用M10i或M11!(當然,M機用疊影對焦,有另一種味道!)
首先我用天工電子接環,可以自動或手動都得,自動對焦速度不錯,特別是用tracking,真係好似玩緊原廠鏡頭咁,好爽!另外,用手動時,對焦點會顯示綠色,既方使睇,又比peaking準得多,而且同樣支援tracking,合焦時隻眼或面同樣會著起綠色,簡直是手動對焦的一大突破!
另外多左個黑白照片選擇製,真係方使好多!以前M機,要入menu起碼要㩒兩三次,先影到黑白,然後想影返彩色,又要入menu㩒兩三次,好麻煩!而家用ZF,影影下彩色,隻眼望住觀景窗,右手推一推就影到黑白,好爽!
3)鏡頭及配件
配長少少既鏡頭,唔好睇!暫時只有兩支28和40mm SE鏡夾部ZF!
加接環的話,原廠轉F鏡個接環又大又核突,加埋支F鏡好長!假如用天工接環,插上短少的M鏡連遮光罩,例如是七妹加方hood,超靚!又或者用天工再加多個FM接環,再插上短少的nikon手動鏡,例如是ais 50mm 1.8,就好襯!
假如支鏡較長,加手柄會好睇d,不過smallrig個手柄,不太靚,而且高度同快門制唔夾,唔好㩒!
希望Nikon快d出多d夾ZF既鏡頭和手柄。