優點:
唔伸長時好型,我配 APS-C 機 80D,45點雙十字對焦點,感覺對焦非常快、靜、準! 暫時未試過對唔到焦、或迷焦等問題。
另我有時配 FF 機 6D,雖然只得中央一點對焦,但使用 FF 機後作品放大後,都會較清晰,成像直逼 L 鏡。
我賣左一代二仟頭,補左仟幾即時去買左呢支二代。
如果影人像或花卉,保持 1.2M 最近距離後 Zoom 長,能夠輕易營造淺景深效果。比一般細光圈標準鏡,更能容易玩前清後朦感覺。
缺點:
變焦伸出時較醜樣,所以我訓練自己,習慣左伸出後即順手縮回鏡筒,到需要再影遠時先再伸出!
非 L 鏡循例冇跟遮光罩,我只買左副廠代用就算,另鏡頭直徑比一代寬,亦比較型仔!
呢支鏡冇預設用腳架環,夾硬去配都冇剩餘位置夾穩,所以大家要預算用直倒手柄平衡。
比一代少左防震 Mode1 / Mode2 模式,唔知係好左定差左? Mode1 係上下左右防震,Mode2 只係左右防震,大部份適合拍攝移動中物體、例如賽車及飛行中鳥類。但係二代撇除左呢個 Mode 1/2 選擇後,唔知會唔會對 Mode2 防震效用減低呢???
評價:
我同一代比對過,一代焦距到300mm盡時,成像較朦朧! 二代明顯有改善,個人覺得改善左有 3~4 成,但當然始終唔及 L 鏡。所以我都習慣唔會下下 ZOOM 盡,一般我都係用 70-280mm 內範圍。
如果配合全片幅機,呢支鏡成像會更加細緻銳利,焦距上使用更加方便。尤其70-220mm 範圍內,加上充足自然光下,成像媲美 L 鏡,色彩亦非常鮮艷,令到我好多朋友都話味精非常重,但艷麗搶眼!
絕對推薦買呢支鏡,始終都係原廠鏡,DDP 修正後四角改善明顯,光圈雖然最大係 F4,但光線不足下,比副廠鏡更易對焦,而且合焦機會率非常高,追蹤高速動態玩連拍非常正,性價比超高。
有人話呢支鏡對焦速度還算可以,其實呢支 Nano USM 新馬達新鏡,網上好多評測都話,對焦速度比任何白鏡更快,應該係話現今 Canon 所有鏡群中,算最快! 如果覺得未夠快,相信係本身部機問題,唔可以下下怪哂支鏡,須知好鏡都要配好機,寶劍都要配英雄啦!
利申:雖然我都有小小白 IS,但我都係比較喜歡拎呢支出街,因為外觀型得嚟又低調,好多影友都唔太識有呢支型號嘅鏡,所以成日偷望或直接問你支咩嘢鏡! 同埋起碼都多 100mm 用,能夠 ZOOM 遠多少少就係多少少,而且(佳能小小黑)較低調,街頭 Snapshot 如果下下拎小小白 IS,我覺得有點誇張!