闊別達人頻道已有好一段日子，今次主要講嘅唔係攝影，而係講登山單車。你可能會話，吓，有冇搞錯係度講啲九唔搭八嘅topic。係咪九唔搭八，睇落去就知。
今次介紹呢部登山單車（硬架車）係德國品牌Bergamont嘅Platoon 4.3，屬2013車款（單車都有年份有版本㗎）。價錢係登山車中應該屬於中下價貨（因爲大部分比較靚嘅登山單車動輒過萬至數萬元不等），但我覺得用料，配置及性能方面其實已經非常好（可能因為我要求不高關係），各大單車徑以及上落山亦綽綽有餘。全避震車又如何？當然好，不過價錢更貴！
究竟單車同攝影有乜關連？很多時候，影相嘅目的地未必一定車可以到達（例如去船灣水壩影星，上大帽山頂影雲海等等等等)，可能仲要徒步行一段長路先去到，此時單車就可以發揮佢嘅長處，要去邊踩去邊，揹箸相機背囊或Messenger Bag消遙自在。可能你會問，踩任何類型都得喇，點解要揀登山單車啊？登山單車嘅好處就係佢可以適應任何路面情況（平路，泥路，爛路，山路，乜路都基本上得)，其他車種如小輪車，休閒車，Dup頭車（即公路車）對路面有一定要求，唔係話一定唔得，不過有機會踩死你（講笑）。
對於追求健康而又喜歡攝影嘅朋友，一部登山單車跟一機數鏡同腳架又點少得呀！
Bergamont Platoon 4.3
一些小配搭，令座駕更個人化
三十速波段，上幾斜都冇難度。
落斜好幫手，碟煞話停就停！
以下分享一些邊踩邊拍（當然係停低架車set好器材先影喇）嘅爛相數張（當中有DSLR影嘅，亦有用手機影嘅）：
單車徑旁影穌光
晨霧與晨光！
城門河沙田段影划艇
沙螺洞眺望大埔及馬料水
夜闖大埔工業村
大美督夜色
船灣壩上眺望馬鞍山及洞梓新建觀音像！
壩上風光
