由於覺得近排天氣都不佳，所以有種發掘新攝點嘅睇法，多數唔係上高山，而係走古道或者比較平嘅山路～同埋影相影得越耐，筆者漸趨多元化，從前只影風景，淨係影風景都影到有d悶，而家咩都影一餐xD
最先筆者由於購入Helios 44-2 58mm f2 (八羽怪)，因為此鏡頭有極好眩光表現，開始留意品味小作。稍後有機會出：神奇老鏡 - Helios 44-2 58mm f2 文章。今次主力都係品味小作，所以混合左幾支鏡頭唔同焦距。所以大家自己估下邊張相係用八羽怪xD 今次我唔打每張相setting了～如果有興趣加我ig問xD
instagram: andrewncy.images
正式開波！
有次去西貢大浪西灣，朋友有帶lensball，於是試吓擺係沙灘到玩！
但係影影下，無啦啦屎窟痕想挑戰極限，決定等海水湧埋嚟，再加上低位構圖先有震撼力，為咗防止風險，筆者影一張成功就算。收檔！
唔好話我唔俾貼士大家xD 呢張有眩光咁勁，就係Helios 44-2 58mm f2 (八羽怪)！
貼地構圖，係筆者最近特別喜歡，因為能夠以小動物，最接近角度拍攝，最有feel！
行到去呢度鹿頸村，小連島沙洲，有位師兄疊石仔，身為品味專家嘅我，理所當然打卡留念！
有次行東澳古道，有當地村民曬緊棉花樹，成地一盤盤紅色花，低角度影埋去散景實好靚，即諗左0.5秒，就飛埋去貼地咁影！
又行行吓東澳古道，見到村民後花園種咗好多玫瑰，身為近排愛花之人，都即刻打卡試留念。暫時筆者程度只係鍾意影，咩嘢花係咩嘢名完全唔清楚xD
直落嗰日旅程行到大澳，見到養貓呢個題材，ig亦都係出長熱門題材，為咗顯示自己都有影貓嘅實力，當然打卡出相xD 貼地超低角度，第一視點拍攝。
跟住呢張係第二次到大澳，逆．東澳古道，今次由大澳行返出東涌，陽光比上一次好，所以影出嚟嘅相，特別加分！
除咗貼地拍攝之外，後面仲有散景，筆者都幾喜歡呢張作品。
一路行返出去去到深屈村，無啦啦發現一堆bamboo stick，覺得幾有feel，於是影下啦～
聽聞大埔海濱公園3月果時有靚花，無聊就落樓下影下啦，當打卡年功都好。當時試鏡頭又好，今次試嘅係... 買咗返嚟幾個月，由於實在太重嘅關係(9xx)，筆者實在冇心大概每次出動... Helios 40-2 85mm 1.5 (太陽神)。呢支鏡我諗有排先出到神奇老鏡文章，喺度買一買關子先xD
原來叫繡球花
水水有feel~
男人一枝花咪當我老花
又係大澳，不過今次先拜完山爺爺，先展開開始，今次旅程冇乜影相，主要行吓散步出返東涌～ iphone8 plus 影的
又係又係大澳啊～不過今次行去佢細佬嗰度... 二澳～ 又係影花時候～
黃色花唔知叫咩名
唔知咩機器但影落己幾feel～
終於面對逆光時候，咁勁flare，唔使講都知咩鏡呀嘛～
行東梅古道途中... 經過一啲村民住所，好位婆婆喺自己屋企門口擺攤檔。
有次行大埔富善街街市，見到咁多薯仔一囉囉，構圖應該幾特別，加上用Nikon 105mm 2.5 P.C (阿富汗少女鏡)，散景同埋壓景應該效果出嚟唔錯～
雞蛋我自細都好鍾意食，咁樣一排排咁樣，都幾有feel，唔使諗影低佢！
話說城市發展係不爭嘅事實，某達地方嗰度開始俾人收地，所以要打卡留念！留返將來睇又好，當係一個回憶又好。細個以前一日入到田，第一樣野就係見到呢個井。細個嗰時好好奇，成日喺度問阿媽個井點樣嚟，點解會有水，水又係邊度嚟～
路邊野花不要采，呢度只有蜜蜂采xD
頂呀嗰時阿媽喺度講呢個係咩植物， 而家大家都唔記得！
呢個盆呢個角度，其實我啱啱買相機嗰陣時影過，不過幾年之後，功力大提升xD
最後媽媽喺度洗收成品，自覺好有feel，即刻打卡留念！
今次小品作品分享到呢度， 平時筆者真係影風景多，不過影風景張張都對焦到無限遠，長期都係咁樣，難免有啲乏味。筆者大多數都係手動鏡，手動鏡頭雖然不便，但能夠觀察觀景器，對焦距離輕微變化，實在係一件賞心樂事。我繼續以用心看honkong態度影相、拍攝、打卡留念同埋欣賞香港。
希望黎緊有機會或者有mood分享其他野，老鏡、新鏡頭又好，日常遇上大景出動經歷又好～唔知下次幾時，會遇咩大景又可以成個故仔咁呢^.^v
歡迎加ig交流！
instagram: andrewncy.images
多謝收看！多謝睇我分享！
