作為一個喺觀塘返咗工近四年嘅社畜，小弟對觀塘可謂又無愛只有恨（哈哈…）
不過又咁，作為香港第一個衛星城市，觀塘新舊交替嘅面貌、人來人往嘅街市、橫街窄巷嘅塗鴉，甚至係充滿 Cyberpunk 風情嘅觀塘藍色多瑙河…真係求其停落嚟都有嘢好影呀！
▲ 日復日經過荒謬嘅鴻圖道，某朝早突然發現佢嘅美就影低咗。
某日放工行去裕民坊搭紅 Van，見到有啲 Ching 喺天橋開晒腳架，我梗係衝去睇埋一份啦！原來咁多位係影梗日落，事關每日放工我都係雞咁腳咁走人，有幾可停低咁好閒情逸緻影相吖！不過當日個夕陽又真係「係靚嘅」，只可以話係可遇不可求。
▲ 現場欣賞觀塘日落景色更為優美。
官腔 Mode：其實無論打風定落雨，觀塘都係個攝影好處。
有次打八號波，人人都趕住返屋企，大家都知啦…觀塘無嘢多，人多。又喺同一天橋上，就畀我影到下面嗰幅震撼畫面！正所謂：「永遠等車一世紀，每晚都塞駿業里。」相信如果你都係「每日 hi 觀塘母親」群組嘅成員，應該都會有種莫名嘅親切感。
▲ 八號風球人人都趕住返屋企，咁嘅情景又點可以唔記錄一下。
講返鴻圖道，呢個鴻圖道變電站一直係塗鴉大師嘅創作基地，奈何畫得快、亦清得快，影低咗第二日可能就無晒…所以我經過時都鍾意影吓。（利申：並非鼓勵喺公眾地方塗鴉，只係小弟單純以欣賞塗鴉作為藝術喺城市度產生嘅景色 only）
▲ 渠王嘅塗鴉真係好靚。
話到明「快樂觀塘」，喺觀塘有咩係值得快樂先？就係睇貓喇！貓咪總係為大地帶來治癒，而貓亦成為觀塘社畜嘅心靈慰藉。其實觀塘除咗貓 Cafe，都有唔少舖頭貓，如果大家細心留意吓，唔難搵到一眾貓店長嘅身影。
P.S. 仲係試相好題材～
▲ 呢隻貓女嘅毛色真係好特別。
▲ 每日我都會去望佢咁滯。
尾聲：
有日放工，個天好似幾靚咁，我同阿制作人（都係女同事 :D）去咗觀塘海濱 Chill 吓，正所謂酒逢知己千杯少，不過自問酒量麻麻，都係飲呢啲「女人先飲」嘅酒就算…順個便周圍影吓。
▲ 對酒當歌，人生幾何。
欲知後事如何，且待下回分解。
本集完。
—————
香港攝影平台（敝平台）地味女編輯日常廢文廢相，乜都影、最鍾意貓。
面書專頁
https://www.facebook.com/garueditordaily
