鍾意影風景嘅朋友，一定會被網上好多攝影師拍出嚟如詩如畫嘅海岸風景照片所吸引，究竟點樣可以影到呢類型嘅照片呢？
秘密就係，只要你有減光鏡（ND filter）嘅話，再加上相機設定為bulb，咁樣基本上就可以拍攝到呢類型嘅coastal landscape image。但係如果大家冇ND filter，或者嗰日去到現場先發現唔記得咗執出嚟，又或者可能因為相機背囊已經實在太多嘢，根本就唔想執出去用嘅話，仲有冇方法可以盡量延長曝光時間，令到啲水滑一滑？
呢一日，我就拍咗條片，教大家點樣用相機入邊嘅設定，嚟到做到呢個效果。依家大家一齊去片：
點樣拍攝流水？無減光鏡一樣可以做到！
雖然用減光鏡一定會再靚啲（啲水再滑啲），但係起碼都可以影到張似樣啲嘅相呃下like，嘻嘻！
用文字嚟做一個總結：
1.ISO越低越好
2.光圈越細越好
3.快門時間越長越好
好多攝影師會選擇用快門先決嚟到拍攝呢類型嘅照片，因為想首先調教最長嘅快門，然後等個相機自己調整適當嘅光圈。冇錯，咁樣嘅做法其實最正路，理論上亦都最快可以完成個設定，跟住就可以拍攝。但係我自己反而會選擇光圈先決。點解？其實真係冇得解（笑），純粹個人拍攝習慣（繼續笑）。所以如果大家習慣咗係用快門先決嚟到拍攝呢類型嘅照片嘅話，其實都冇問題。
今次我喺條片度冇用bulb，最主要原因係因為唔想撳住快門制令到照片模糊。其實大家可以設定曝光時間長過30秒，以Sony A7rIII 為例，我會建議大家download Sony Imaging Edge app，喺手機做遙控拍攝，一來咁樣唔會震動到相機（又可以慳返買快門線啲錢），二來最重要就係可以長過30秒曝光！點解今次我唔用？因為今次用緊手機拍片，所以我就用唔到囉！下次等我有機會再拍條片示範俾大家睇吓點樣做遙控拍攝。
希望呢條片幫到大家。如果大家想學多啲關於攝影嘅嘢嘅話，記住唔好錯過我嘅攝影教學影片：
日出點樣先至可以影得靚？相關相機設定要點set？
日落點樣先至可以影得靚？今次教你用濾鏡！
專業風景攝影培訓班 ｜Master Class in Landscape Photography (Lesson 1)
專業風景攝影培訓班 ｜Master Class in Landscape Photography (Lesson 2)
------
如果喜歡我嘅教學，請subscribe 我嘅YouTube channel：
Learning with Jacky Lee 為你加油
有你哋嘅支持，我會分享多啲關於攝影題材嘅教學，多謝大家！
https://www.patreon.com/sklphotography
