搭車去旅行－雲南篇
Day 2 昆明
尋晚係長途火車渡過，9點零入睡直到今朝8點先起床，我講起床都無錯，因為成晚都打橫瞓晒三個位 ～ 半夜除了偶爾辛苦醒來，其他時間都算瞓得到～ 今早6時才到廣西既南寧，停站起碼半小時，隔離站剛好也有一列高鐵，看清楚原來係去桂林的！ 如果深圳都有高鐵向西去雲南有多好…
瞓醒後看見出面D山好得意，又如過高山又如過谷咁，經對面個阿姨講原來呢度係廣西既平果； 傾開原來佢識廣東話架！ 多麼的親切啊～ 原來佢嫁左落廣東，依家返廣西既百色探望年老既媽媽； 佢問我邊度人我梗係答返我鄉下肇慶啦～(講香港怕比人打) 當佢知我去雲南旅遊時，佢都講依家後生既，都好鍾意週圍去架！ 早餐食上車前買既杯麵，及尋日食剩既煎餅。
火車尾聲，與一男一女閒聊起來，女既住近中緬邊境既傣族人，去到昆明漏夜再要坐多十幾小時臥鋪巴士回家！ 佢4、5十歲仲掛住玩wechat搵真愛，佢話上個月係當地潑水節，仲比左佢潑水節時穿上民族服飾既照片我睇tim! 男既係醉酒佬，鍾意不停吹水～ 我已完全融入內地長途火車文化，當正自己屋企，除鞋，撓腳好隨意咁坐，認真回想，外國人坐長途車迷一樣係咁！ 後來更都唔介意個醉酒佬伸腳在我身旁既坐椅，此外車上都有好多好人，大多互相關照，然後大家各散東西，真是一剎那既緣份。
車上風光
晚上8時終於到達雲南昆明，落車時與友善既乘客合照； 計一計足足28.5小時，相信係我歷程裡，需時最長，而又路程最短吧…
昆明火車站，於早幾星期前發生恐怖斬人案，現在有好多武警駐守； 落車係大馬路搵了間門面頗靚既酒店，上到房先知，¥148但竟然無空調！ 真定假呀？ 沖涼後發現剛洗完既面極速爆冊喎！ 真係乾到爆！ 於是落街食野時問一問其他住宿，原來昆明好多住宿都無冷氣架！ 搵到一間有冷氣要$178
來到雲南梗係食米線啦～ 仲有一大桶酸菜任你落！¥8 但d肉得薄chichi幾片，加¥5再多幾片先~食完行過隔離再食蒸餃+茶葉蛋¥7.5。 此外食野時已發現昆明蚊患十分嚴重，返到酒店發現窗既蚊網破爛，房內有蚊，於是搵服務員，原來櫃筒有電蚊片，都好d⋯ 瞓前拍死三隻蚊，希望電蚊片有效啦⋯
@2330
Day 3 西雙版納
早餐後問路人地鐵有個站叫南客運南站，落車過對面就係長途汽車站喇！ 開往邊境、寮國北部既車都有； 諗住買十多分鐘後開往元陽既車票，點知賣晒，要買下一班1230，無計… 見仲有咁多時間行去附近既商貿城坐吓先～ 後來發現原來係元陽再去西湘版納全是山路需時廿幾個鐘架！諗諗吓我最終目的係想去寮國啫，無謂㗰咁多時間吖！況且依家去睇梯田都唔啱時候… 於是我買同一時間開往景洪(即西雙版納)的巴士，¥226 需時8個鐘！ 職員話可以半價退回元陽既車票… 我諗不如做兜客叫賣吓先啦～ 叫賣了十分鐘放棄了，睇黎我都唔係食呢行飯架啦! 哈哈～ 見仲有時間去食個午餐先～ 食完上車，乘客裡有一啤德國情侶，個德國男同職員全程用國語溝通，真係堅！ 說來慚愧，好過我多多聲…
1230準時開車，車上只有小貓三幾個乘客，咁少客都可能因為1200有一班卧舖同去景洪（貴¥30），咁我覺得日光日白又唔使卧舖既。 車上坐椅完全係南美坐長途巴士既坐位，有多塊板"浪腳"，坐椅可以"埃"到160度！
7個小時既車程，全是在山區高速公路行駛，由昆明開始一直落山，沿路盡是梯田，可能無元陽咁出名吧！看著這些梯田，大部份都在陡峭既山坡上，真係行上去一轉都想死，仲話要耕田！偶爾見到這些農民係懸崖山坡暴曬幹活，都有點鼻酸酸既感覺… 唔知當遊客或愛攝影既人去到元陽，拍下梯田美景既同時，又有幾多人想到這個美景是辛勞既農民，不知用左幾多代先建成架呢？D農民又幾咁辛酸呢？見到農民係咁惡劣環境下生存，真的覺得自己好幸福！
而係山區行駛，穿過無數既隧道，開山劈石，耗費多少人力物力，工程巨大難以想像（第一次去漢中已有同感），如果無隧道、公路打通這些與世隔絕既偏遠山區，這裡既農民應更加命苦… 沿途仲有好多小村既建築風格各具特色，有條小村每間屋既牆上都有圓形大標記，另有條村每間屋既頂部用藍色瓦片，牆身均有隻仙鶴… 雲南是多民族既省份，真不知是傣族，彝族還是苗族了～
車程後段瞓著左，醒後已過左普洱，其實好想望一望，我地成日都飲既普洱茶原產地， 原來係雲南！ 普洱茶，內地讀“耳”，回港後查證得知，我地香港人都一直讀錯，應該同內地一樣讀過“耳”字，但我相信，我去飲茶都應該會繼續錯落去，哈哈！ 原本8個鐘既車程變左10個鐘，係2200終於到左西相版納… 鬼叫呢架巴士見人少少，車底無乜人放行李，善用埋來運貨，攪到成日停站撈埋送貨咩!
找到住宿食完晚餐後係街散步，行回烏燈黑火既巴士睇吓資料，原來每朝0630都有巴士開往寮國多個城市，這裡不知是否中途站呢？ 於是再逛，原來我落腳既大街行過d仲有小販開檔喎！馬路旁仍有人擺地攤賣水果，9成賣芒果，但體積大過日常所見既兩陪！ 這個傣族既地方，所有建築物與泰國相似，路牌甚至政府建築物都有傣族文字，但傣族人又有幾個懂得呢？ 包括我搭火車既傣族阿姐，佢都話只識幾句咋！行左陣開始落微雨，於是急促回酒店，但願雨水可換來農民偷得浮生啦～
香港既同事及朋友講，今日新疆又炸死左30幾人，泰國軍人奪權，香港發紅色警示，聯同之前既越南，依家東南西北包圍住我都有危險呀！
Day 4 西雙版納
我去旅行既風格當然係瞓到自然醒啦～ 0930起床，過左酒店連埋早餐時間了… 反正國內食野便宜，都無所謂，比著係歐洲一定唔好蝕呀！
先去長途巴士話買定聽日0730開往寮國琅勃拉邦既車票，¥180，然後係站內無人既旅遊資訊枱面攞長地圖，一邊食野一面研究去邊度好，市內大彿寺雖然係地標，但太過商業化應該唔好了，反而想去傣族村落感受一下，地圖有介紹叫傣族園，問隔離枱既當地人傣族園是真正村落，只是有私人公司包起來辦理，好！一於去睇睇！ 食完呢個人仲請埋我Tim~ no pay，太好了～
市內風光
沿馬路向南行去到版納車站，站裡面更殘舊暗暗的，係往附近鄉村的車站；於是¥18搭去猛罕鎮(又名橄欖貝)，沿路是山路，不是高速公路，途中見有大量既橡膠林、蕉林、及一個名叫菠蘿山既地方，種滿菠蘿！
1小時40分鐘車程到達猛罕鎮，再轉¥3三腳雞去傣族園，個車伕係一名大叔，上車時已不停講那傣族園收費，並向我講解每種門票，起初我以為佢想呃錢… 到步後買了入場費$40，接駁車票$50，呢位大叔無呃我錢太好人，仲話佢都六十幾歲，呃我D錢都無用！ 乜雲南咁多好人架～
入場正直歌舞表演，去睇睇先～ 乜個個傣族女仔都有腹肌架！ 睇完幫襯門口小食檔，園內是真正傣族人聚居，看見D婆婆擺賣，不自覺想幫襯多一點； 傣族食物以煎、炸為主，叫左太多食唔晒，個圓形大米餅食剩一半比番婆婆。 不過食野期間看見剛表演完D傣族美女出來，有D肥肥地架… 呢D點解頭先見唔到既？唔通係後排攻擊既？ 見佢地好似自己家人咁係攤檔度自己整野食，仲用傣語溝通Tim! 睇黎係無花無假噃～
行到水池有每日一次既潑水活動，只見後生既傣族姑娘木無表情⋯ 鬼咩! 原本一年一次既民族節慶，係呢個村內變成公式化⋯ 食完見全市都咁多菠蘿賣，我都幫婆婆買番個先，¥5人仔，砌完4份，見婆婆入袋，我話唔使，拎住成個食先夠豪氣嘛！ 沿路D傣族阿姨見我咁食都係度笑呀～ 菠蘿食落好味，唔酸無渣既，怪不得有人講西湘版納既菠蘿係最好食架啦～
回程我係湄公河，內地稱為瀾滄江落車，原河邊既長廊慢慢行；其實我對東南亞無乜認識，只知湄公河係泰國，原來源頭係中國喎！流經寮國再到泰國。 呆望湄公河，下個目的地就係寮國相見啦！
晚餐求其食一間自稱土產既餐廳，餐牌上有狗肉! 我當然無點這道菜啦⋯ 食完同友善既老闆娘傾計，係多民族既雲南，我最好奇當然係乜野民族啦! 佢話係哈尼族，向我講解兩這既截然不同既分別，傣族女子皮膚白，身形窈窕，而哈尼族則皮膚黑黑，有水筒腰等⋯ 哈! 又會有咁大對比既!
