【香港旅行】赤柱廣場之比利時街頭窩夫店遊記

發覺其實赤柱好似好多餐廳，但好多其實都係連鎖店，就算唔係赤柱都食到，所以今次就搵左間得赤柱先有嘅小店。

原本想去boat house，但發覺佢喺冇幾耐之前已經結業，雖然我想去唔係因為佢啲嘢食好食，而係因為佢算係赤柱嘅一個landmark，個個去赤柱都會去嗰度打卡，甚至係上上面邊食嘢邊睇赤柱嘅風景，所以我就搵咗間類似嘅，係一間食比利時窩夫甜品嘅小店，佢係喺赤柱廣場嘅4樓，餐廳有少量嘅位置，可以睇到黑板上總會提供Wi-Fi密碼，如果唔想喺餐廳食都可以喺廣場4樓出邊嘅觀景台既室外位置食，嗰度都有一啲枱、櫈、太陽傘提供，可以望到赤柱嘅海景。

店舖主打比利時窩夫，每個款都可以揀加唔加雪糕，除咗窩夫仲有法國朱古力批、美式班戟、全素窩夫、雪糕三文治、雪糕筒、奶昔、新地凍鮮奶、東檸檬梳打、咖啡奶茶熱飲等等。

雪糕有一球，係朱古力味，食落正常唔算苦亦都唔算好甜，味道係餐廳決定咗，如果想轉口味要加$10。窩夫都係用比利時入口嘅材料整，麵團加入甜菜根提煉嘅比利時珍珠糖，烤焗過後都唔會溶咗，所以形成咗一個脆面，珍珠糖夠甜唔使落糖漿。而窩夫食落嘅質感好似麵包同蛋糕之間，食落唔會太乾，硬度係可以用膠匙羹切得開，食落小小鬆脆，唔算好脆嗰種亦都唔算好腍嗰種，算係煙韌帶一啲嚼勁，不過如果蛋香味再多啲會更好，連埋雪糕食會一冷一熱冰火交融，再加上淋上去嘅朱古力醬，不過因為窩夫有溫度，雪糕會好快融。配料仲有一大堆切片香蕉，同埋一啲迷你棉花糖粒，食落就正常發揮。

蘋果玉桂食落暖暖地，因為新鮮整出嚟，味道偏甜，甜中帶少少果酸，玉桂味就唔係太食得出，不過蘋果玉桂係一樣好難整得難食嘅一樣嘢，整體算不過不失因為溫度足夠。而雪糕係雲呢拿，食落就正常冇咩特別，都係同窩夫一齊食形成對比。

比利時窩夫兼做散水餅窩夫

呢間小店都有提供甜品到會同平價散水餅賣，有窩夫棒、冬甩棒、曲奇、蝴蝶酥、貝殼蛋糕等等，個個都有獨立包裝好適合買一大堆，唔同地區買夠一定數量仲可以送貨上門，唔使特登過嚟赤柱買，而且接受急單，仲可以訂製寫上鬼馬散水餅字句的貼紙，打卡度爆燈。