【廢墟攝影】荒廢17年嘅電氣化火車

大家平時搭火車經過火炭站嘅時候，有冇留意到有一列第一代嘅黃頭電氣化火車停喺車廠入面呢？自從我幾年前知道佢嘅存在之，我每次搭火車經過火炭都會留意下佢仲健唔健在，一直都好想入去一探呢架碩果僅存嘅黃頭火車。早排終於的起心肝用自己方式入去車廠為佢留影。

黃色頭係唔係好親切呢？其實車頭鬆黃色係一個警戒色，因為電氣化列車相對柴油列車行車速度高且寧靜，而且當時鐵路沿線仍有好多地方係開放嘅，隨時可能有人誤闖路軌，所以九鐵便跟隨英國做法，將電氣化火車車頭髹上黃色警戒色。

至於點解呢一列黃頭可以逃過翻新而幸存落蒞。其實係因為1984年一列黃頭(E45)喺上水出軌，導致兩個普通等車卡234,235號(舊編號)報廢，剩餘一卡頭等233(舊編號)號未有損毀。數年後列車(E58)於廠內發生意外，撞毀一個頭等車卡458號。於是九鐵利用多出嘅頭等卡233號頂替458號位置。

估計可能因為兩次意外總共損失3卡車箱，之後亦未有訂購新列車填補空缺，導致最後九鐵為黃頭進行中期翻新工程時多出3卡列車，無法併成一組12卡列車而未被翻新，所以呢一組E44號列車可以逃過翻新幸存落蒞。

路線圖停留喺未有落馬洲支線，九龍塘站寫住轉乘地下鐵路嘅年代，同埋車門上九鐵系嘅警告，全部都代表一個逝去嘅年代

經典嘅橙色硬膠櫈，仲有啲波波扶手

以前嘅坐位係對對住咁住坐，方便傾計之餘又好有外國feel

貿意下左右兩邊嘅路線圖，兩邊方向係唔同嘅，當你面向幅圖嘅時候係跟住個行車方向，下一個站就會喺車頭方向嗰邊

仲係地下鐵路！

3 + 2 座位排列唔係得巴士先有，以前黃頭上面都有

3人座位坐入面嗰個要出蒞都幾麻煩

以前地鐵同火車未翻新之前，車門前嘅地板都刻住車廠名，唔知大家仲記唔記得呢？火車呢個仲寫住ENGLAND架！

細個唔多機會搭火車，嗰時火車唔係好迫，就算搭，父母都唔會坐頭等，所以從來都冇坐過黃頭嘅。同行朋友同我一樣都冇坐過，而家終於有機會坐返當年冇搭過嘅頭等

其實最初嘅頭等啲櫈係橙紅色嘅同埋窗邊係有張几仔，張几仔喺80年代中九鐵改裝車廂嘅時候拆左，至於張櫈幾時變左色就真係唔知

頭等前面就係行李倉，乘客如需使用行李倉需為購買行李票，朋友以前試過坐行李倉，據講以前如果太多人係會放人入去行李倉。唔知大家又有冇試過上行李倉呢？

準備進入駕駛室，可以見車頭嘅到緊急逃生門

終於有機會入到火車駕駛室參觀，我覺得成個駕駛室嘅精髓係車頂嗰盞燈，盞燈睇落好鬼old fashioned 好有味道

駕駛室內嘅控制面板，有啲電車GO嘅feel

17年前嘅今日就係第一代黃頭電氣化火車最後一日載客，唔經唔覺17年過去，翻新左嘅佢好快亦都會退下火線。希望呢一列因意外而幸存嘅黃頭有朝一日可以被人修復重見天日，唔會被當成廢鐵消失於無形啦。

P.S 感謝K.H Ng 提供第一代電氣化火車榮休之旅相片

© 2016 - 無人之境 ∣ Abandoned HK

無人之境Facebook: https://www.facebook.com/abandonedhkre