評價:
可能期望太高, 對畫質有dd失望,尤其是ISO400以上, 完全唔覺得係而家呢一兩年推出的大CCD(1/1.6")應該有的表現. ISO800勉強可用, 800以上都只係理論上可用, 實際上唔會用果隻.
XZ-1 色彩係靚, 但就算用"natural" color mode 亦有點un-natural地過濃, 或者可能我用開DSLR吧.....我本身亦有E-PL1, 都有呢個問題, 我仲以為係Pen系列既特色, 原來連DC 機仔都係咁, 似乎係O記風格如此. 不過值得一讚係color mode仲可以入去微調, 只要我將saturation略減就比較OK了.
我覺此機F1.8大光圈的優勢非在於散景(DC 講散景, 算了吧..) 而是在於暗的環境下不用閃光燈拍攝, 真的頗強, 過往用過的DC, 於室內如果zoom了又不用閃燈的話, 基本上就算有防震都好難避免鬆郁朦. 但XZ-1 真的算叫做可以做到了. (另一部有此能耐的是Canon S95, 因為她的防震的確比較強)
部機質感唔錯, 但渣上手感覺唔係好穩陣, 同埋我手大, 真係比較易會甩手, 打算去買條手繩(原裝只得掛頸繩及鏡頭蓋繩, 其實以機仔黎講最好梗係用手繩, 大舊麻甩如我用頸繩掛部XZ-1響心口? 唔好玩啦....@@ 送多條wrist strap 成本會貴幾多ar? 咁咪男女user都照顧晒囉, 唉)
LCD display畫質唔錯, 但太光! 我就算響機身set左display光度 -1, 影出黎d 相返到屋企用電腦睇時, 都比用XZ1睇暗左起碼半級. 呢種光度咁強既LCD 我真係未用過, 要好好適應. (E-PL1都唔會有呢個問題, 唔知E-PL2有無?)
因為我有E-PL1, 對其菜單基本操作上尚算熟悉, 不過鏡頭上的操控環感覺有點鬆, 不夠紮實, 如果緊一點感覺會更好, 高級一點. 鏡頭蓋也有點太兒戲, 如果不用鏡頭蓋繩, 我可以保證個蓋9成9會用用下跌左. 一定要用鏡頭蓋繩.
微距模式無一按即用, 有點不方便, 但超級微距(1cm S-Macro) 真係幾強, 鏡頭差唔多貼住被攝物都對到焦, 但要留意, 用S-Macro 時鏡頭只可以用28mm, 唔zoom得的. 用正常Macro mode先可以, 但正常macro又唔算對到好近既野. 如果要影下遠又影下近, 都幾多掣要按的.
閃光燈係另一弱項, 火力不足, 其造工也太低級(很玩具feel..)以三千幾的相機來說, 理論上應該可以好一點的. 但有hot shoe可加外置閃燈也算挽回一點分數.
AF 對焦速度算快, 但準確度就未算很高, 尤其是如果用多點對焦拍微距. 拍到汗都滴埋都可能未對到想對的位, 所以我通常都會係用自選對焦點. 變焦速度只算一般 , 4倍變焦的高階DC來說應該可以更快一點. 拍片時也可以zoom, 但拍片的質素非常普通, file size也很大, 如果追求拍片功能的朋友不要考慮XZ-1了.
Art Filter 一貫地幾好玩, 比E-PL1 還多了一個dramatic filter(其實兩者Art Filter 同樣係6個, 但E-PL1的懷舊Sepia Filter轉了去XZ-1可作微調的Monotone mode上), 但用filter的話, 拍攝及處理的速度依然較慢. 場景mode 還有一個"雙重曝光", 喜歡創作攝影風格的話, 幾好玩的.
用了數天, 整體上都尚算滿意, 以這價位來說, 絕對是不錯的選擇.